ਲਾਲ ਕਿਲ੍ਹਾ ਕੰਪਲੈਕਸ ਤੋਂ ਚੋਰੀ ਹੋਇਆ ਸੋਨੇ ਦਾ ਕਲਸ਼ ਮਿਲਿਆ, ਮੁਲਜ਼ਮ ਹਾਪੁੜ ਤੋਂ ਕਾਬੂ

ਦਿੱਲੀ ਦੇ ਇਤਿਹਾਸਕ ਲਾਲ ਕਿਲ੍ਹੇ ਵਿਚੋਂ ਚੋਰੀ ਹੋਏ ਕੀਮਤੀ ਕਲਸ਼ ਮਾਮਲੇ ਵਿੱਚ ਵੱਡੀ ਕਾਮਯਾਬੀ ਮਿਲੀ ਹੈ। ਅਪਰਾਧ ਸ਼ਾਖਾ ਨੇ ਸੀਸੀਟੀਵੀ ਫੁਟੇਜ ਦੇ ਆਧਾਰ 'ਤੇ ਜਾਂਚ ਕਰਦਿਆਂ ਮੁੱਖ ਦੋਸ਼ੀ ਨੂੰ ਉੱਤਰ ਪ੍ਰਦੇਸ਼ ਦੇ ਹਾਪੁੜ ਤੋਂ ਗ੍ਰਿਫ਼ਤਾਰ ਕਰ ਲਿਆ ਹੈ। ਉਸਦੇ ਕਬਜ਼ੇ ਤੋਂ ਇੱਕ ਕਲਸ਼ ਬਰਾਮਦ ਹੋ ਗਿਆ ਹੈ। ਹਾਲਾਂਕਿ, ਜਾਂਚ ਦੌਰਾਨ ਖੁਲਾਸਾ ਹੋਇਆ ਕਿ ਕੁੱਲ ਤਿੰਨ ਕਲਸ਼ ਚੋਰੀ ਕੀਤੇ ਗਏ ਸਨ, ਜਿਨ੍ਹਾਂ ਵਿੱਚੋਂ ਦੋ ਅਜੇ ਵੀ ਲਾਪਤਾ ਹਨ। ਉਨ੍ਹਾਂ ਦੀ ਤਲਾਸ਼ ਲਈ ਛਾਪੇਮਾਰੀ ਜਾਰੀ ਹੈ।

ਇਹ ਘਟਨਾ ਉਸ ਵੇਲੇ ਵਾਪਰੀ ਜਦੋਂ ਕੁਝ ਦਿਨ ਪਹਿਲਾਂ ਲਾਲ ਕਿਲ੍ਹਾ ਕੰਪਲੈਕਸ ਦੇ 15 ਅਗਸਤ ਪਾਰਕ ਵਿੱਚ ਜੈਨ ਭਾਈਚਾਰੇ ਦਾ ਧਾਰਮਿਕ ਸਮਾਗਮ ਚੱਲ ਰਿਹਾ ਸੀ। ਪੂਜਾ ਸਮਾਰੋਹ ਦੌਰਾਨ ਇੱਕ ਵਿਅਕਤੀ ਰਵਾਇਤੀ ਧੋਤੀ ਪਹਿਨ ਕੇ ਚੁੱਪਕੇ ਨਾਲ ਸਟੇਜ 'ਤੇ ਗਿਆ ਅਤੇ ਮੌਕੇ ਦਾ ਫਾਇਦਾ ਚੁੱਕਦਿਆਂ ਕਲਸ਼ ਨੂੰ ਆਪਣੇ ਬੈਗ ਵਿੱਚ ਰੱਖ ਕੇ ਉੱਥੋਂ ਨਿਕਲ ਗਿਆ। ਇਹ ਸਾਰਾ ਮਾਮਲਾ ਸੀਸੀਟੀਵੀ ਵਿੱਚ ਕੈਦ ਹੋ ਗਿਆ।

ਬਰਾਮਦ ਹੋਇਆ ਕਲਸ਼ ਸੋਨੇ ਅਤੇ ਕੀਮਤੀ ਪੱਥਰਾਂ ਨਾਲ ਸਜਾਇਆ ਗਿਆ ਸੀ। ਇਸ ਵਿੱਚ ਕਰੀਬ 760 ਗ੍ਰਾਮ ਸੋਨਾ ਅਤੇ 150 ਗ੍ਰਾਮ ਹੀਰੇ, ਰੂਬੀ ਅਤੇ ਪੰਨੇ ਵਰਗੇ ਕੀਮਤੀ ਰਤਨ ਜੜੇ ਹੋਏ ਸਨ। ਇਹ ਸਿਰਫ਼ ਧਾਰਮਿਕ ਗਹਿਣਾ ਨਹੀਂ ਸੀ, ਸਗੋਂ ਜੈਨ ਭਾਈਚਾਰੇ ਦੇ ਧਾਰਮਿਕ ਆਚਾਰ ਵਿੱਚ ਰੋਜ਼ਾਨਾ ਪੂਜਾ ਪਾਠ ਦਾ ਇੱਕ ਅਟੁੱਟ ਹਿੱਸਾ ਸੀ।

ਪ੍ਰਬੰਧਕ ਕਮੇਟੀ ਦੇ ਮੈਂਬਰਾਂ ਨੇ ਕਿਹਾ ਹੈ ਕਿ ਇਹ ਕਲਸ਼ ਕਈ ਸਾਲਾਂ ਤੋਂ ਪੂਜਾ ਰਸਮਾਂ ਦਾ ਕੇਂਦਰੀ ਹਿੱਸਾ ਰਹਿ ਚੁੱਕਾ ਹੈ ਅਤੇ ਇਸਦੀ ਚੋਰੀ ਨਾਲ ਭਾਈਚਾਰੇ ਵਿੱਚ ਗਹਿਰਾ ਦੁੱਖ ਤੇ ਰੋਸ ਪੈਦਾ ਹੋਇਆ ਸੀ।